Општина Гевгелија објави меѓународен тендер за регулирање на коритото на Сува река

Општина Гевгелија денеска го објави меѓународниот тендер за изведба на градежните работи за регулирање на дел од коритото на Сува река во рамки на проект од ИПА програмата за прекугранична соработка со Грција за кој општината доби грант од 516.500 евра.

Со овој проект всушност продолжуваат активностите за заштита на реката Вардар и на целиот прекуграничен регион од загадување во кој партнери на општина Гевгелија од грчка страна се универзитетот „Аристотелу“ од Солун и општините Пеонија и Халкидона.

Понудите за изведба на градежните работи од проектот кој предвидува регулирање на најкритичниот дел од коритото на Сува река во должина од 600 метри во јужната урбанизирана зона на Гевгелија, може да се доставуваат најдоцна до 9 јануари 2019 година на адреса на локалната самоуправа во Гевгелија.

-Ова е капитален зафат за општина Гевгелија, што поради неговата висока вредност мора да го реализираме во фази од кои првата е регулација на најкритичниот дел од коритото. Сметаме дека со реализација на проектот ќе ја унапредиме прекуграничната соработка со нашите партнери од општините Пеонија и Халкидона во Грција и дека ќе создадеме нови предуслови прекуграничниот регион да го напрфавиме еко регион,рече гевгелискиот градоначалник Сашо Поцков.