Општина Битола додели награда на Виолета Томовска за животно дело

Општина Битола, на доајенот на македонската народна песна, битолчанката Виолета Томовска и додели наградата за животно дело, со што ги заокружи свеченостите посветени на празникот на градот, 4-ти Ноември.

На синоќешната свечена академија во Битола, управниот одбор за доделување на наградата „4-ти Ноември“ ги врачи и признанијата за годишни постигнувања, успеси и афирмација на градот во областа на науката, литературата и спортот, кои освен од домашната, беа поздравени и од меѓународната јавност, односно претставниците на збратимените градови од Франција, Србија и од Бугарија, кои престојуваа во овој град.

Празнувањето на денот на ослободувањето на Битола почна со традиционалната ноќна атлетска трка по Широк Сокак, продолжи со меѓународен шаховски турнир на слепи лица, а главен фокус беше ставен на златниот јубилеј – 50 години од збратимувањето на Битола со францускиот град Епинал.

Домаќините и гостите од Франција за публиката приредија две ликовни изложби чии автори се Жан Пол Маршал и Петар Ставрев, градоначалниците Наташа Петровска и Мишел Хајнриш во централното градско подрачје засадија дрво, а потпишаа и Повелба за новите правци во меѓусебната соработка на двата града.