Олумчев: Најавен четвртиот ковид бран и во Гевгелија

Двата случаи на новоинфицирани од Ковид-19, кои по кусо затишје се евидентирани во Гевгелија во последниот извештај на ИЈЗ, според епидемиологот Сашко Олумчев, го означуваат почетокот на четвртиот корона бран во гевгелиско.

Тој напомена дека очекувал зголемување на бројките на заразени некаде кон крајот на август, но следејќи го развојот на ситуацијата вели дека недисциплината придонесе тоа да се случи и порано.

– Фактот што последниот случај во нашиот град беше вакциниран пациент, кој повторно се инфицирал, потврдува дека вакцините против ковид само го штитат организмот да не развие потешка клиничка слика. Затоа мора да сме свесни дека и покрај тоа што сме вакцинирани треба и понатаму да ги почитуваме мерките за носење заштитни маски во затворен простор, да држиме растојание и да одржуваме хигиена на рацете, нагласи Олумчев.

Повторното воведување на рестрикции и локдауни, смета Олумчев, само ќе создаде револт кај населението и ќе ги зголеми здравствените проблеми од психолошки аспект.

– Сметам дека младите треба да се вакцинираат оти и тие се дел од синџирот на заразата, додека третата доза на вакцина моше ќе треба да се прими, но тоа сепак ќе зависи од ситуацијата со бројот на вакцини што ќе можеме да ги набавиме, вели Олумчев.