Одбележана 75-годишнината од излегување на јадрото на кумановскиот партизански одред

Куманово, 26 јуни 2018 (МИА) - Општинската организација на Сојузот на борци за Куманово ја одбележа 75-годишнината од излегувањето на првите кумановски партизани.

Претставници од Општина Куманово, деца од градинката „Ангел Шајче“ и членови на здружението Полициски воени ветерани положија свежо цвеќе пред споменикот во бавчата на Денко Цеков, таткото на првоборецот Јордан Цеков Дане, место од каде се излезени седум партизани сметани како јадро на формирање на првиот кумановско-партизански одред. На овој начин Општинската организација на Сојузот на борци за Куманово ја одбележа 75-годишнината од излегувањето на првите кумановски партизани, борци од НОБ.

За значењето на 26 јуни, од името на Сојузот, пред присутните говореше Зора Ивановска. Од здружението на борците порачаа дека ваквите настани не смеат да се заборават.

На 10 октомври одредот е преименуван во скопско-кумановски одред и е разделен на две чети, првата дејствува во реонот Куманово, Кратово, Крива Паланка, а втората во Скопска Црна Гора. Откако одредот достигнал бројка од сто луѓе, влегол во составот на првиот кумановски народноослободителен партизански баталјон и понатаму започнале да се одвиваат борбените дејства.

Истовремено, делегација од Сојузот на борците положи свежо цвеќе и во бавчата на Ангел Тодоровски, татко на народниот херој Христијан Тодоровски Карпош, во Бедиње.