Обвинителството бара притвори за Онкологија

Основното јавно обвинителство Скопје, заедно со поднесените обвиненија во предметот „Онкологија“, до Основниот кривичен суд Скопје вчера поднесе и предлог за определување мерка притвор за двајца обвинети – медицински и организациски директор клиниката за онкологија, информираат утрово од Обвинителството. 

Во фазата на истрага за овие лица на сила беа мерки на претпазливост, но со поднесување на обвинението подигнат е степенот на сомнение за обвинетите, како и извесноста од кривично правна одговорност и од санкционирање за нивните противправни дејствија.

Поради опасност од бегство како резултат на природата и тежината на предметните кривични дела за кои им се поднесени обвиненија, за тројца обвинети лекари – онколози предложени се мерки на претпазливост – привремено одземање на патна исправа, велат од Обвинителството. 

Предметот Онкологија вчера доби обвинение откако Обвинителството ја заврши истрагата за овој случај. Обвинети се 5 лица кои се сомничат дека ја краделе и манипулирале терапијата за болните од рак.