Обвинителство бара притвор за Крешник Бектеши

Љупчо Коцевски информираше дека најголемиот дел од осомничените се испитуваат за кривичното дело „тешки дела против безбедноста на луѓето“, за кое се предвидени затворски казни од најмалку 3 до најмногу 20 години.

Освен ова, обвинителството истражува и случаи поврзани со евентуално давање поткуп, како и незаконска набавка на пиротехнички средства.
Можеби ќе ве интересира

Во моментот се приведени и задржани 14 лица во полициските станици, меѓу кои е и поранешниот министер Крешник Бектеши. Обвинителството за сите нив ќе побара одредување мерка краткотраен притвор. Во оваа фаза од постапката може да им биде одреден само 48-часовен притвор, но по формално отворање на истрагата, постои можност притворот да биде продолжен и на 30 дена.

– Полицијата има законско овластување да го приведе и да го уапси секое лице кое придонело за последиците, без разлика за кого се работи. Тоа што можам да го ветам е дека истрагата ќе биде брза и ефикасна и дека сите што се огрешиле ќе одговараат. Ги разбирам граѓаните дека имаат огромна тага и болка, бидејќи и јас самиот чувствувам гнев, но апелирам дека мора смирено да делуваме и да се осигураме дека веќе никогаш нема да се соочиме со слични работи – потенцираше Коцевски.

Во однос на осомничените кои моментално се во тешка здравствена состојба, тој изјави дека постапката против нив привремено е ставена во мирување и ќе продолжи веднаш откако нивната здравствена состојба ќе дозволи натамошни процесни дејствија.