Нигерија: Загинаа 30 навивачи на Јунајтед

Голема трагедија се случи во Нигерија, а поврзана е со Манчестер Јунајтед, чии 30 навивачи смртно страдаа додека го гледале натпреварот помеѓу Јунајтед и Андерлехт (2:1) во четвртфиналето, во Лига Европа.

 

Несреќните луѓе настрадале во градот Калабар, додека заедно го гледале натпреварот и навивале за својот тим против белгискиот тим.

 

Навивачите се наоѓале под далновод, кој поради временски неприлики попуштил, што предизвикало пукање на каблите. На самото место смртно страдале седуммина, а медиумите во Нигерија пренесуваат дека бројката на загинати од струен удар е триесет.

 

Клубот од „Олд Трафорд“ по повод трагедијата се огласи на Твитер.

 

„Нашите мисли се со навивачите, нивните пријатели и семејства, кои се погодени од трагедијата во Калабар“.

 

Инаку, Манчестер Јунајтед го мина Андерлехт со голот на Рашфорд во 107.минута, а во полуфиналето ќе игра против Селта Виго.