НАТО ќе ангажира 36 илјади војници на вежба за спротиставување на закана од ИД

НАТО планира да одржи големи воени вежби со учество на 36 илјади војници со цел да се спречи заканата на Исламска држава од јужното крило. 

Команданти на НАТО синоќа најавија една од најголемите вежби во сложено „сценарио на лажна закана“ во која милитанти напаѓаат од копно, од воздух и море.

- Не можеме да избираме меѓу закани од исток и закани од југ, мора да се вежба за двете, изјави генерал Ханс Лотар Домросе од Командата во Холандија задолжен за подготовка на вежбите.

Во вежбите што ќе се одржат од 3 октомври до 6 ноември во Италија, Шпанија и Португалија ќе учествуваат војници од повеќе од 30 држави меѓу кои и од Шведска и Австрија.

НАТО не организирал толку големи воени вежби од 2002 година кога 15 држави  членки и 12 партнерски држави учествуваа во проверка на подготвеноста во Норвешка и Полска.