Над 150 милиони евра од унгарскиот кредит префрлени кај бизнисот, во четврток состанок со општините за договорите од вториот повик

Најверојатно во четврток ќе се одржи состанокот со општините на кој ќе бидат потпишани договорите од вториот јавен повик по што тие ќе можат да објавуават огласи за проектите, рече денеска премиерот Христијан Мицкоски. Тој информира дека над 150 милиони евра од унгарскиот кредит преку комерцијалните банки се префрлени кај бизнисот, а за локалните самоуправи годинава се предвидени околу 200 милиони евра.

Реализацијата кај општините е нешто помала од очекуваната и на тоа, напомена, се работи дополнително.

-До овој момент половина милијарда или околу 500 милиони евра од унгарскиот кредит се потрошени за да се врати еврообврзницата подигната во 2018 година. Последната информација што ја имам, поврзана со кредити кон стопанството, е дека таа бројка е над 150 милиони евра кои се доделени преку комерцијалните банки во бизнисот, а за општините во Буџетот за годинава имаме предвидени околу 200 милиони ерва, истакна Мицкоски.

Со вториот повик за општините и потпишувањето на договорите, рече премиерот, ќе се заокружи вкупната сума средства земени од унгарскиот кредит - за враќање стари долгоиви и за развој и капитални инвестиции на државата.