Му иде да се врати и да среди се!

Манчестер Јунајтед се наоѓа во сериозна резултатска криза, а голем дел од одговорноста се префрла на сметка на тренерот Оле Гунар Солскјер.

 

Во последните 5 кола во Премиерлигата, „црвените ѓаволи“ освоија само 1 бод, а по неделниот дебакл на „Олд Трафорд“ од најголемиот ривал Ливерпул (0:5) сите очи се вперени кон раководството на клубот од каде се очекува преземање на чекори за излез од ситуацијата.

 

Најголем дел од фановите бараат смена на менаџерот, но по два дена од мечот, Солскјер е се уште со тимот.

Англиските медиуми пишуваат дека се во тек разговори за иднината на Норвежанецот во Манчестер, а дел од преговорите е и легендата на клубот, Сер Алекс Фергусон.

 

Прославениот менаџер денеска бил виден како влегува во тренинг центарот „Карингтон“ во друштво на екс-претседателот Мартин Едвардс. Наводно Фергусон е за опцијата неговиот поранешен ученик да продолжи на кормилото на клубот.

 

Неофицијално, таа опција ја поддржува и потпретседателот на Јунајтед, Ед Вудворд кој заедно со директорот Ричард Арнолд имал средба со претседателот на клубот, Џоел Глејзер.

 

Состаноците продолжиле и денеска, во присуство на популарниот Ферги, а се уште не е познат крајниот епилог.

 

Се шпекулира дека Антонио Конте е можен наследник на Солскјер. Италијанецот моментно е без ангажман.

 

Дефинитиво норвешкиот стратег е под огромен притисок, но се чини дека тој ќе седи на клупата на викенд пресметката со Тотенхем.