Младинскиот репрезентативец Цветковски се врати во МЗТ Скопје

Членот на младинската кошаркарска репрезентација на Македонија, Андреј Цветковски (19 год, 190 см), денеска потпиша двегодишен договор со МЗТ Скопје Аеродром и ќе биде дел од екипата која сезонава покрај двете домашни натпреварување, ќе настапи и во престижниот Еврокуп и секогаш силната АБА-лига.

 

Цветковски од почетокот на подготовките на шампионот напорно тренира со останатите првотимци и од него се очекува да биде од помош на бековските позиции, со оглед на големиот број натпревари кои ги очекуваат избраниците на тренерот Емил Рајковиќ. Ова воедно претставува негово враќање во „Јане Сандански“, каде што настапуваше во најголем дел од досегашната кариера во младинските категории. Минатата сезона тој беше дел од тимот на Работнички.

 

Талентираниот бек на неодамнешното младинско ЕП-дивизија Б во Грција настапи на седум натпревари на кои имаше просек од 9,1 поен и 2,9 скокови. Претходно тој беше дел од кадетската и јуниорската репрезентација на Македонија, со вкупен настап на пет континентални собири од Б-дивизијата во периодот од 2012 до 2016 година.

Претходно, договорни обврски со МЗТ Скопје потпишаа Американците Џош Скот, Џеремаја Мејси и Ксавиер Темс, Холанѓанецот Шарлон Клоф, Србите Ѓорѓе Дреновац и Урош Лучиќ, Хрватот Јуре Лалиќ како и членот на најдобрата македонска селекција, Марко Симоновски. Под договор се уште и неговиот колеги од националниот тим, Љубомир Младеновски и Адем Мекиќ.