Маск се премисли: Ќе продолжиме да ја финансираме Украина и покрај тоа што Старлинк ни носи загуби

Илон Маск синоќа изјави дека неговата ракетна компанија „СпексИкс“ (SpaceX) ќе продолжи да ја финансира нејзината Интернет услуга „Старлинк“ (Starlink) во Украина, само еден ден откако кажа дека веќе не може да си го дозволи тоа заради огромните загуби.

Маск на Твитер напиша: „По ѓаволите…иако Старлинк продолжува да губи пари, а другите компании добиваат милијарди долари од даночните обврзници, ние ќе продолжиме да ја финансираме украинската Влада бесплатно“.

Не е јасно дали понудата на Маск била искрена или саркастична. „СпејсИкс“ не одговори веднаш на барањето за коментар.

Маск во петокот кажа дека „СпејсИкс“ не може да го финансира „Старлинк“ во Украина на неодредено време и побара трошоците во иднина да ги покрива американското Министерство за одбрана-Пентагон.

Оваа услуга им помогна на украинските цивили и војската да останат онлајн за време на војната со Русија.

Маск преку социјалните мрежи претходно се судри со украинските официјални лица околу мировниот план што тој го изнесе, за кој Украина вели дека е премногу дарежлив кон Русија.