Лијам Фокс: Периодот на транзиција за Брегзит треба да трае до следните избори

Изјавата на Фокс доаѓа по најавите во медиумите дека министрите во владата „во основа се согласуваат, транзицијата да трае меѓу две и четири години“.

Транзицијата е нов момент во процесот на Брегзит, откако стана јасно дека владата е длабоко поделена во врска со стратегијата околу британското напуштање на ЕУ и дека министрите почнаа „отворена војна“ за тоа дали да се спроведе „тврд“ или „мек“ Брегзит.

Според Фокс, но неколкумина други министри, сега сите се согласуваат дека транзицијата е неопходна, како преоден период за прилагодување на британскиот бизнис, откако земјата , формално, ќе излезе од Унијата, на крајот на март 2019 година.

Овој министер, со претензии да ја наследи Тереза Меј на лидерската и премиерската функција, е припадник на ториевската десница, евроскептик и силен поборник за напуштање на ЕУ.

Фокс претходно инсистираше на брз „развод“ од Унијата, отфрлајќи ја можноста за останување на земјата на единствениот пазар на ЕУ и во царинската унија. Тој тврдеше дека „брзо и без потешкотии“ земјата ќе склучи договори за слободна трговија и дека „десетина земји“ веќе сега се подготвени за почеток на преговарите.

Велика Британија не може да отвори таков процес додека е формално дел од ЕУ, а тоа значи во наредните две години, па министерот Фокс сега ја брани потребата од транзиција, стравувајќи дека неизвесноста може да ги исплаши инвеститорите и да предизвика пад на вработеноста.

Тој смета дека транзицијата, сепак,  треба временски да се ограничи за конзервативните гласачи, кои гласале и за Брегзит, да не помислат дека транзицијата претставува изговор за одлагање на напуштањето на ЕУ.