Крводарителска акција во Кичево по повод Денот на извидништвото

По повод 22 февруари - Светскиот ден на извидништвото денеска во организација на Извидничкиот одред „Мирко Милески" од Кичево, а во соработка со Црвениот Крст и Центарот за трансфузиона медицина од Кичево, се реализира крводарителска акција.

Бобан Стојановски, член на Извидничкиот одред „Мирко Милевски“, изјави дека со денешната акција ги завршуваат планираните активности за овој месец.

- Акцијата е во рамки на „Направи добро дело“ која се состоеше од повеќе други активности спроведени овој месец. На оваа акција и претходеше искачување на планината Илиница, како и акција за помош на едно социјално загрозено семејство, рече Стојаноски.

Доктор Викторија Јовчева, трансфузиолог, соопшти дека до 12 часот имало околу 15 крводарители. Таа посочи дека најмногу има дарители од А крвната група, но ги повика сите оние кои сакаат да даруваат крв, од утре да го сторат тоа во Центарот за трансфузиона медицина во Кичево.