Кремљ со реакција на изјавата на Макрон: Нуклеарното ширење не е решение за Европа

Кремљ денеска соопшти дека смета оти ширењето на нуклеарно оружје во Европа нема да придонесе за безбедноста на европскиот континент.

– Ширењето на нуклеарно оружје на европскиот континент е нешто што нема да ја зголеми безбедноста, предвидливоста и стабилноста на европскиот континент, изјави на брифинг портпаролот на Кремљ, Дмитриј Песков.

Макрон претходно изјави дека неговата земја е подготвена за дијалог за распоредување на своите авиони способни за носење нуклеарно оружје во други земји на ЕУ.

Говорејќи на тема европско нуклеарно одвраќање, Макрон вчера рече дека Франција нема да плаќа за безбедноста на другите.

– Сакам да почнам дебата, но Франција нема да плаќа за безбедноста на другите, тоа нема да биде одземање од она што го имаме, а конечната одлука секогаш ќе биде на Франција. Подготвени сме да отвориме дискусија, посебно за распоредување на авиони вооружени со нуклеарни бомби во други европски земји, рече Макрон.