Кошта: ЕУ ќе се брани од секој облик на присила, ќе го штити меѓународниот поредок

Европската унија ќе се брани од секој облик на присила и ќе го штити меѓународниот поредок заснован на правила и меѓународното право, изјави денеска претседателот на Советот на ЕУ, Антонио Кошта.

– Подготвени сме да се браниме себеси, нашите држави членки, нашите граѓани, нашите компании, од секој облик на присила. А Европската унија има моќ и алатки тоа да го стори, рече Кошта во говор во Европскиот парламент.

Тој додаде дека ЕУ „не може да прифати законот на најсилниот да преовладува над правата на најслабиот“.

– Бидејќи меѓународните правила не се изборни. А сојузите не можат само да се сведат на низа трансакции, додаде Кошта.

Американскиот претседател Доналд Трамп претходно се закани со воведување царини од 10 отсто од 1 февруари на стоки од Велика Британија, Норвешка и шест држави на ЕУ вклучени во арктичките воени вежби на Гренланд, кои би се применувале додека не се постигне договор за американско преземање на Гренланд.

Претседателката на Европската комисија, Урсула фон дер Лајен, вчера во Давос изјави дека европскиот одговор на царините ќе биде „непоколеблив, обединет и пропорционален“.

МИА