Кочанските пожаникари апелираат да се внимава со палење оган на отворено

Поради високите дневни температури Територијалната противпожарна единица на Кочани  денеска излезе со апел до граѓаните да внимаваат со палењето на оган на отворено и при вршење на жетвените активности. Особено да се внимава и на исправноста на плинските уреди на моторните возила.

- Приоритет за оваа година ни е превентивно да дејствуваме на предизвикување пожари на отворено, особено кога земјоделците ги извршуваат жетвените активности кај јачменот и пченицата, а во планинаскиот терен и на ржта, изјави Дејанчо Арсов, командир на ТППЕ Кочани.

Арсов посебно ја истакна нивната превентивна улога во едуцирањето на населението од планинските села во Осоговијата за заштита од пожари, доколку дојде до нив, но првенствено да не се пали оган на отворено и како да се заштитат имотот, куќата и стоката. Тој апелираше и на совесно однесување на граѓаните при движење во шумските региони или при викенд престој во планина.

Годинава, истакна Арсов, се  регистрирано два помали пожара во шума. Од почетокот на годината ТППЕ од Кочани учествувала  на 64 интервенции од кои половината биле  на отворен простор од кои 31 во општина Кочани, две на територијата на општина Чешиново – Облешево  и една интервенција на пожар во  општина Зрновци.