К.Лазаров: Ги распоредивме силите и за Словенија

Македонската ракометна репрезентација ја постигна и втората победа, откако синоќа во Мец беше совладана Ангола со 31:22. Триумфот беше најавен во финишот на првиот дел, а отпорот беше целосно скршен кон средината на вториот дел.

-  Очекувано Ангола беше подобра од натпреварот со Словенија. Ние почнавме лошо и имаше малку нервоза. Имавме шанси, но не ги реализиравме. После се си дојде на свое место и сите играчи добија шанса со што ги распоредивме силите во пресрет на дуелот со Словенија, особено што имаме и ден одмор, изјави капитенот Кирил Лазаров.

Со слично мислење е и еден од поискусните во репрезентацијата Филип Миркуловски, кој истакна:

- Знаевме дека Ангола ќе одигра подобро од дуелот со Словенија. Лошо почнавме, но ја постигнавме и втората победа. На Словенија одиме со две победи, а оваа репрезентација добро ни е позната. Со победа над Словенија може да се оди на второто место.

На дуелот со Ангола, иако беше неизвесен сепак настапи Велко Маркоски, кој се чуствува подобро и самиот потенцираше дека ќе биде подготвен за следниот натпревар во понеделник.