Кипарски експерт предвидува четврта помош за Грција

На Грција, најверојатно, ќе и треба четврта програма за помош, изјави кипарскиот економист и добитник на Нобеловата награда во 2010 година Христофорос Писаридис.

- Се плашам дека ќе има четврти меморандум, изјави 69-годишниот Писаридис во интервју за грчката телевизија „Скај“.

- Кризата и штедењето ќе завршат кога Грција ќе биде во можност да се врати на меѓународните финансиски пазари, рече тој, додавајќи дека според него, малку е веројатно тоа да се случи пред крајот на тековната финансиска помош во август 2018 година.

Експертот исто така повика итно и без одложување да се спроведат повеќе реформи за да се привлечат инвестиции, со цел земјата да излезе од седумгодишната должничка криза. Тој рече дека политичката нестабилност и недостигот на политичка волја да се спроведат реформи се главни фактори за проблемите на Грција во реализирањето на финансиската помош.

Од мај 2010 година Грција потпишаа три програми за финансиска помош со меѓународните кредитори со цел излез од должничката криза.