Казнев: Забраната на буркините би била противуставна

Законот за забрана на буркините, каков што планира да го поднесе опозицијата, би бил противуставен, изјави францускиот министер за внатрешни работи Бернар Казнев.

Тој за католичкиот дневен весник „Кроа“ посочи дека националната забрана за буркините би била „противуставна, неефективна и би предизвикала непријателски расположенија и непоправливи тензии.

Во петокот највисокиот француски административен суд - Државниот совет ја укина забраната за буркините на плажите во Вилнов-Лубе. Одлуката е преседан за десетиците приморски градови.

Судската одлука натера десетици политичари да побараат од Парламентот да воведе национална забрана за буркините, оценуваќи дека тие се симбол на радикалниот ислам.

Околу 30 општини забранија буркини на плажите по нападот во Ница, кога загинаа 86 луѓе.

Според францускиот Устав забранети се религиозни симболи во државните институции. Франција е прва европска држава која целосно ги забрани хиџабот и бурката во државните институции во 2010 година. Хиџабот е забранет во училиштата уште од 2004 година.