Јолевски се сретна со акредитираните воени аташеа во Македонија

Министерот за одбрана на Република Македонија Зоран Јолевски и началникот на Генералштабот на АРМ генерал-потполковник Методија Величковски денеска во Домот на АРМ имаа традиционална годишна средба со воените аташеа акредитирани во Република Македонија.

На традиционалната средба, министерот Јолевски нагласи дека највисок приоритет за наредната година останува континуитетот во спроведувањето на реформите, а интеграцијата во НАТО-алијансата стратегиска цел. 

- Одличната соработка со вас е потврда за одличната одбранбена соработка помеѓу Република Македонија и вашите земји“, им порача министерот Јолевски на аташеа.

Според Јолевски оваа година ја одбележале поголем број реформи во одбранбениот систем, меѓу кои, продолжување на придонесот во мисијата „Одлучна поддршка“ во Авганистан, на процесот на евалуација на декларираните единици, унапредувањето на интероперативноста на Армијата и учеството во меѓународни вежби. Како суштински елементи од одбранбените реформи, ги спомена почетокот на процесот за модернизација, реализацијата на проектот „АРМ – мој вистински дом“ и трансформацијата на Воената академија.