Иванов со сенатори на САД: Да се внимава на безбедносните аспекти на бегалската криза

За време на Минхенската безбедносна конференција претседателот Ѓорге Иванов денеска оствари средба со американскиот сенатор Џон Меккејн, на која присуствуваа и сенаторите Шелдон Вајтхаус, Даниел Коатс, Роберт Коркер, Том Котон, Џони Ернст, Давид Пердју, Бенџамин Сас, Дан Саливан и Џозеф Либерман, јави известувачот на МИА.

Сенаторите и конгресмените се интересирале за сите аспекти на бегалската и мигрантска криза, а посебно за безбедносните предизвици. Тие пројавиле интерес за тоа како се одвива размената на податоци помеѓу релевантните служби.

Претседателот Иванов ги информирал за случувањата, како и за преземените мерки и активности, истакнувајќи дека ситуацијата сo меѓудржавната соработка и размената на податоци е малку подобрена во однос на лани, но е далеку од потребната посебно при една криза од вакви размери.

Претседателот Иванов нагласил дека евроатлантската интеграција е врвен стратешки приоритет за Република Македонија и во таа насока се заблагодарил за американската поддршка за аспирациите на земјата за членство во НАТО, дополнувајќи дека нештата ќе беа многу поразлични доколку Македонија одамна го добиеше заслуженото членство во НАТО и ЕУ.

Сите присутни сенатори едногласно изразиле поддршка за Република Македонија за нејзините евроатлантски интеграции, и истакнале дека за САД Македонија е од исклучителна важност за стабилноста на регионот.