Искршени 7 блокатори, наплатна рампа и истепани двајца вработени од пајак службата во Тетово

Непознати сторители целосно ја оштетиле наплатната рампа на затворениот паркинг “Лирија”, спроти судот во Тетово. Случајот е пријавен во полиција, ќе се разгледуваат снимките од безбедносните камери, а против сторителите ќе следуваат соодветни казни, информираа од ЈП градски паркинг.

-ЈП “Градски паркинг” повторно апелира граѓаните да се воздржуваат од вакви несакани вандализми. Урбаната опрема треба сите да ја чуваме, градот припаѓа на сите подеднакво. Ова не е добра слика на нашето Тетово, додадоа од претпријатието.

Од претпријатието велат дека секојдневно се соочуваат со тешкотии во работењето. Само во изминатава недела насилно биле симнати 7 блокатори на тркалата кои биле поставени на возилата кои подолго време биле паркирани, а не платиле за паркинг. 

Неодамна двајца вработени од пајак службата биле физички нападнати додека подигале непрописно паркирано возило. Тие се здобиле со полесни телесни повреди, а против напаѓачот е поднесена пријава во СВР Тетово.