Иса Мустафа не сака избори во јуни, за време на Рамазан

Доколку денеска и се изгласа недоверба на косовската Влада ќе следи распишување предвремени парламентарни избори, а косовскиот премиер и лидер на Демократскиот сојуз на Косово (ЛДК) Иса Мустафа вели дека неговата партија не сака избори во јуни, во време на празникот Рамазан.

- Ние не се согласуваме во јуни да се оди на избори кога муслиманите слават, тогаш не можеме да водиме кампања. Не се согласуваме изборите да бидат тогаш, туку сме за тоа да седнеме и да се договориме, рече Мустафа, а пренесе РТК.

Мустафа додаде дека очекува Демократската партија на Косово (ДПК) да го испочитува коалицискиот договор, бидејќи во косовската Влада не е само ЛДК, туку и ДПК, како и дека не гледа причина ДПК да биде за изгласување недоверба на владата.

Мустафа претходно кажа дека собранието ќе го разгледува договорот за демаркација со Црна Гора, истиот ден кога ќе се гласа за доверба на владата.