Хагари: Почна четвртото ослободување на заложниците, продолжувањето на примирјето се уште не е конечно

Портпаролот на израелските одбранбени сили-ИДФ, контраадмирал Даниел Хагари, доцна вечерва изјави дека почна четвртото ослободување на заложниците од Појасот Газа.

Тој рече и дека продолжувањето на привременото примирје во војната со Хамас не е конечно, но оти постојано се преговара со посредници.

– Ништо не е конечно додека не се случи. Работите напредуваат и вечерва, но потребно е трпение, рече Хагари.

Исламскиот екстремистички Хамас, во нападите на југот на Израел на 7 октомври киднапираше и одведе околу 240 заложници во Газа. Хагари го обвини Хамас дека снимал пропагандни видеа за ослободување на заложниците во последните три дена, објавија израелските медиуми.

На видеата се гледа како екстремистите им мавтаат на заложниците додека заминуваат, а Хагари вели дека тоа нема да ја прикрие „бруталноста на Хамас“.

Израелскиот премиер Бенјамин Нетанјаху вечерва на крајот од владиниот состанок за воениот буџет изјави дека планот за заложниците продолжува како што е договорено и оти клучна цел е нивно ослободување и елиминација на Хамас и да се осигура дека заканата нема да се повтори, алудирајќи на ненадејните напади на палестинските екстремисти на југот на Израел по што почна војната.

Тој не ја коментираше објавата на Катар, Хамас и САД дека е постигнат договор за дводневно продолжување на примирјето кое стапи во сила во четвртокот и требаше да заврши утре наутро.

Израелските власти претходно изјавија дека ќе се согласат на дополнителен ден на примирје за секои десет заложници ослободени од Хамас.

Од почетокот на прекинот на огнот, 39 Израелци се ослободени во замена за 117 палестински затвореници.

Покрај тоа, 19 приведени странци, главно Тајланѓани, беа ослободени надвор од договорот.

Денеска беше најавено ослободување на 11 Израелци и шест Тајланѓани. Израел ќе ослободи три жени и 30 машки малолетници.