Гутереш повикува на максимална воздржаност по иранскиот напад на Израел
Гутереш, говорејќи на состанокот на Советот за безбедност на ОН, им порача на земјите-членки дека повелбата на ОН забранува употреба на сила против територијалниот интегритет или политичката независност на која било држава и го осуди нападот на Иран врз Израел и предупреди на ризикот од натамошна ескалација.
Иран во саботата навечер лансираше напад со огромен број беспилотни летала и проектили кон Израел, како одмазда за израелскиот напад врз иранскиот конзулат во Дамаск, во кој загинаа седум офицери на Револуционерната гарда. Тоа беше првиот директен напад на Иран врз Израел од негова територија во историјата.
„Блискиот исток е на работ. Народот во регионот се соочува со реална опасност од разорен конфликт од големи размери. Сега е време за смиреност и деескалација“, истакна Гутереш на состанокот свикан по иранскиот напад.
Заменик-амбасадорот на САД во ОН Роберт Вуд го повика 15-членото тело недвосмислено да го осуди нападот на Иран, велејќи дека должност на Советот за безбедност е да не ги остави активностите на Иран да останат без одговор.
„Во наредните денови, и во договор со другите земји-членки, САД ќе истражат дополнителни мерки за да го повикаат Иран на одговорност овде во Обединетите нации“, рече Вуд, без да прецизира какви чекори ќе преземе Вашингтон.
„Дозволете ми да бидам јасен – ако Иран или неговите полномошници преземат дејствија против САД или дополнителни дејства против Израел, Иран ќе биде одговорен“, потенцираше тој.
Техеран вчера соопшти дека нападот е одмазда за „израелските злосторства“, односно нападот на иранскиот конзулат во Дамаск, додека Израел ниту ја потврди ниту негираше одговорноста за тој напад.
Од своја страна, иранскиот амбасадор во ОН, Амир Саид Иравани, потенцираше дека акцијата на неговата земја била неопходна и пропорционална и рече дека, иако Техеран не бара ескалација или војна во регионот и нема намера да влезе во конфликт со САД, го потврдува своето право на самоодбрана. „Ако САД започнат воени операции против Иран, неговите граѓани или неговата безбедност и интереси, Иран ќе го искористи своето право да реагира пропорционално“, рече тој.
Амбасадорот на Израел во ОН, Гилад Ердан, на состанокот го обвини Иран за кршење на меѓународното право и пушти видео на таблет што, како што рече, покажува како Израел пресретнал ирански беспилотни летала над џамијата Ал Акса во Ерусалим, едно од најсветите места на исламот.
Ново на Сител
-
Полициските хеликоптери исфрлија над 120 тони вода врз пожарите кај селото Тажево и „Јасен“
-
Скопјанец ги претепал сопругата и малолетниот син, ја искршил и влезната врата од зградата
-
Претрес во скопско, пронајдено оружје и муниција | ФОТО
-
ЕУ ѝ префрла на Украина 1,5 милијарда евра приход од замрзнати руски средства
-
Тетовчани се скарале поради паркинг место, по што едниот извадил пиштол и му се заканил на другиот
-
Драма во Собрание: Неколку пратеници добиле заканувачки пораки
-
Институциите премолчуваат глорификација на терористи и прекршување на Законот за јазиците обвинува Левица
-
Комбе со мигранти се преврте на автопатот кај Бела Паланка, околу 50 повредени