Груевски, министри и градоначалници на терен во Лисиче, механизација го расчистува местото

Претседателот на ВМРО-ДПМНЕ Никола Груевски, заедно со министрите за внатрешни работи Митко Чавков и за транспорт и врски Владо Мисајловски, како и градоначалниците на Град Скопје и општина Аеродром, Коце Трајановски и Ивица Коневски, во моментов се на терен и вршат увид на состојбата во населбата Лисиче, каде во страшното невреме беа поплавени околу 30 куќи.

Механизацијата е на терен и го расчистува местото од наносите на вода и калта.

Груевски, министрите и градоначалниците разговараат со граѓаните чии домови претрпеа најголема штета.

Комисијата за проценка на штета веќе дојде во дел од овие куќи во населбата Лисиче, а во останатите ќе дојде на проценка во следните денови.

Во разговор со граѓаните Груевски потенцираше дека на терен ќе биде пратена дополнителна механизација.

Жителите на Лисиче го посочија големиот проблем со каналот во близина на нивните куќи и им беше потенцирано дека каналот ќе биде исчистен, а проблемот ќе биде решен.