Грција следните денови ќе добие нова транша од помошта

Се очекува утре Европскиот механизам за стабилност (ЕМС) да ја одобри новата транша за Грција, во висина од 8,5 милијарди евра, пишуваат грчките весници. 

Извршниот совет на ЕМС, што го сочинуваат министрите за финансии на членките на Еврозоната, вчера го одобри ажурираниот меморандум, што произлезе по завршувањето на вториот преглед на грчката спасителна програма и заедно со тоа ја повика грчката Влада да ги финализира барањата што беа потпишани од него, со цел доделување на новата транша за Грција од 8,5 милијарди евра. 

Раководителот на ЕМС Клаус Реглинг, ја одложи за утре седницата на Управниот одбор на Фондот, што првично беше планирана за вчера. Одборот е надлежен за донесување на решение за доделување на траншата. 

Одложувањето беше направено со цел Грција да ги реши останатите отворени прашања од процедурален карактер, пред да добие одобрение од ЕМС за трансфер на траншата. 

Зелено светло за финансиите се очекува да даде и Меѓународниот монетарен фонд (ММФ). 

На 15 јуни министрите за финансии од еврозоната и одобрија на Грција транша од 8,5 милијарди долари. 

Од нив, се очекува во текот на следните денови да бидат префрлени 7,7 милијарди долари, додека остатокот ќе биде доделен на есен годинава. 

Речиси целата сума од 7,7 милијарди евра ќе биде потрошена за подмирување на кредитните долгови на Грција во јули, а исто така и за отплата на задоцнетите должнички обврски на земјата.