Грчкиот селектор со провокација: Ќе одиграме два натпревари со Скопје

Македонската ракометна репрезентација во склоп на подготовките за настапот на ЕП 2024 во Германија неделава ќе одигра два пријателски меча против Грција, против која избраниците на селекторот Кирил Лазаров ќе настапат на 3 и 4 ноември во Солун.

Во пресрет на овој двомеч, селекторот на грчката репрезентација, Георгиос Заравина одбива да го користи името Македонија. Во интервјуто за официјалната интернет-страница на грчката федерација упорно го користи името Скопје кога говори за македонската селекција.

„Во Солун ја одработуваме првата недела од подготовките за првиот настап на ЕП, фаза е исклучително важна за нас поради што ќе играме две силни пријателски средби против Скопје. За нас е важно да имаме силни пријателски средби против земји што во последниве години биле постојано присутни во финалните фази од европските и светските шампионати. Ќе испробаме некои работи, ќе консолидираме некои наши посилни особини и ќе се обидеме да вклучиме некои нови имиња поврзувајќи го сениорскиот со младинскиот национален тим,“ изјави грчкиот селектор.