Голема „Македонска вечер“ во Хамбург за собирање средства за изградба на Црковен храм | ВИДЕО

Македонската химна се пееше во едне глас, се вееја македонски знамиња, се истакнуваа македонски реквизити – во Хамбург, Германија се одржа голема македонската вечер, зад чија организација стои Патриотско друштво, Црковниот одбор на црквата во Хамбург, Св. Ѓорги Кратовски и Легаси Евент. Овој настан беше наменет за собирање средства за изградба на македонски православен храм во Хамбург.

Салата во Хамбург која е со капацитет до 500 луѓе, во саботата вечерта беше претесна да ги собере сите македонски иселеници во Германија кои имаа желба и сакаа да бидат дел од овој голем настан и да се вклучат во собирањето средства за изградба на православен храм за македонските верници. Секој од нив, доаѓаше со помисла да ужива во прекрасна атмосфера. Такви беа очекувањата и на бендот на Дамјан Стојаноски, од каде посочија дека каде и да одат, Македонците ја чуваат и негуваат музиката.

Бисер балкански, Заветна, Македонско девојче и уште многу други песни беа на репертоарот на пејачите Методија Столески, Василија Петрова, виолиниската Сања Здјелар и Дамјан Стојаноски со неговиот бенд.

Забавата течеше во најдобро светло, народот уживаше и се забавуваше а тоа беше причина за задоволства кај организаторите кои се потрудија овој настан да се случи. Веруваат дека ова е само почеток и дека македонскиот народ сплотен може да изгради свој храм но може да направи и многу повеќе. Атомсферата и енергијата која луѓето ја чуствуваа секако беше и резултат на одличните настапи на македонските изведувачи кои во овие пет часа ги оставија и гласот и срцето на бината.

Во салата речиси и да немаше човек кој барем еднаш не заигра македонско оро или не запеаа заедно со изведувачите. По она што тие го кажуваа, очекувања од пред почетокот беа исполнети и надминати.

Освен Македонците од Хамбург, на настанот имаше и гости од други делови на Гермнија, а меѓу присутните беше и претседателот на црковниот одбор во Берлин, кој посочи дека соработката меѓу македонските здруженија мора да постои.

Иницијативата за собирање средства за изградба на православен храм во Германија продолжува и во наредниот период, а Македонците покажаа сплотеност и желба истото да го остварат.