Ѓорчев: Бугарското малцинство мора да ја почитува македонската држава

Република Македонија го има достигнато еден од највисокиот стандарди во Европа во однос на почитување на малцинските права. Именувањето на бугарскиот клуб со името Ванчо Михајлов, кој е осведочен соработник на фашистичките режими во Хрватска и Италија, човек чие политичко кредо е политичко насилие и терор, и тоа е забележано не само во Бугарија туку и ширум Европа, значи дека се поткопува и максимата за заедничка историја. За каква заедничка историја зборуваме кога македонската антифашистичка борба и третиот Рајх на Бугарија се две спротивставени страни во историјата. Ова е провокација од Бугарија, изјави во Тема на денот на Сител поранешниот македонски амбасадор во Бугарија, Марјан Ѓорчев.

Според него, не е можно некој наш висок државен претставник да отвори македонски клуб во Бугарија, бидејќи смета дека тоа би предизвикало големи протести од многу политички партии со можност за секакви ескалации.

– Правото на собир од средината на 90-тите е дозволено за нашето македонско малцинство во Мелник за чествување на Јане Сандански. Тој начин на чествување на Сандански или на Кресненското востание, мислам дека досега немало проблем, но во делот на отворањето на македонски културен клуб со провокативни имиња, како што би било името на Ѓорги Димитров, легенда на антифашистичката борба, не би го дозволиле, посочи Ѓорчев додавајќи дека нашата вистинска македонска вредност е тоа дека ние сме дел од европската антифашистичка борба.

Тој оценува дека македонските власти требало да реагираат многу поубедливо и да им стават до знаење на припадниците на бугарското малцинство во земјава дека мора да ја почитуваат македонската држава. Подобрувањето на правата да ги бараат во директен контакт со македонските институции (Владата, Собранието, Претседателот), како што е правото да бидат впишани во Уставот, а не со мешање на бугарската политика во внатрешните работи на земјава, вели Марјан Ѓорчев.