Германија, Британија, Франција и Италија подготвени за мисија за обезбедување на пловидбата низ Ормуската Теснина

Германија, Франција, Обединетото Кралство и Италија изразија подготвеност да помогнат во обезбедување слободна пловидба низ Ормуската Теснина, вклучително и нивно учество во евентуална таква мисија.

Во заедничката изјава на германскиот канцелар Фридрих Мерц, францускиот претседател Емануел Макрон, британскиот премиер Кир Стармер и италијанската премиерка Џорџа Мелони, се наведува дека итното отворање на Ормуската Теснина за „безусловна и неограничена слобода на пловидба“ е од исклучителна важност.

„Подготвени сме да ја одиграме нашата улога во постигнувањето на таа цел – во согласност со нашите уставни обврски – вклучително и преку строго одбранбена и независна мисија за обезбедување на трговската пловидба и спроведување операции за деминирање“, се вели во документот објавен откако беше соопштено за постигнат мировен договор меѓу САД и Иран.

Четворицата лидери ја повторија својата позиција дека на Иран никогаш не смее да му биде дозволено да поседува нуклеарно оружје.

„Сега е од суштинско значење да се спроведат деталните преговори и договорот брзо и целосно да се реализира. Подготвени сме да ги поддржиме тие напори“, се наведува во заедничката изјава.

Четирите земји посочија и можност во иднина да бидат укинати санкциите кон Иран, доколку Техеран преземе јасни и проверливи чекори во врска со својата нуклеарна програма. 

МИА