Гарсија сменет, Спалети нов тренер на Рома

Францускиот стратег Руди Гарсија (51) повеќе не е тренер на фудбалерите на Рома. Гарсија изминатите месеци се наоѓаше под жестоки критики на јавноста и навивачите на ‘волчицата’, по што претседателот Џејмс Палота реши да му врачи отказ.

 

Гарсија на клупата на Рома мина две и пол години, тој во првите две сезони го освојуваше второто место во Серија А, но оваа сезона апетитите на навивачите и раководството пораснаа верувајќи дека Рома може да стигне до шампионската титула.

 

Сепак, Рома игра под сите очекувања, во првенството се наоѓа на петтото место со 34 бодови, седум помалку од лидерот Наполи, а со многу среќа се пласира во осминафиналето во Лигата на шампионите, каде за противник ќе го има Реал Мадрид.

 

Италијанските медиуми јавуваат дека Гарсија ќе го наследи Лучано Спалети кој во периодот од 2005 до 2009 година беше тренер на Рома. 

 

Спалети со Рома освои две титули во Купот на Италија, а потоа се пресели во Зенит во Русија, каде освои две шампионски титули и еден Куп.