Французите најдобри во тимската комбинација на СП во Сент Мориц

 

 

На Светското првенство во алпско скијање што се одржува во Сент Мориц денеска се одржаа тимските натпревари во комбинирани состави. 

 

Селекцијата на Франција во состав, Теса Ворле, Алекси Панторо, Аделнин Муњие и Метју Февр го освоија златниот медал. Иако во четирите дуели против селекцијата на Словачка двата тима имаа по две победи, сепак на крајот пресуди севкупното постигнато време во кое Французите за 8 стотинки имаа подобар резултат од Словаците. 

 

Во малото финале, односно дуелот за бронзениот медал шведските скијачи извојуваа три победи во дуелите со Швајцарците, па на крајот Швеѓаните беа оние кои го освоија сетот на бронзени медали. 

 

Утре е слободен ден на шампионатот, а во четврток (16 февруари) во велеслаломските квалификации ќе настапат шестмината македонски претставници (Антонио Ристевски, Лука Божиновски, Дардан Дехари, Воислав Синадиновски, Марјан Нашоку и Виктор Петров).

 

Тоа ќе биде увертира во главната женска трка во истата дисциплина во која свој настап ќе има единствената дама од Македонија, Лидија Симјановска.