Филмот „Џган“ на фестивал во Фиренца

Филмот „Џган“ во режија на Вардан Тозија ќе биде прикажан на Филмскиот фестивал „Балкан флоренс експрес“ (БФЕ) кој се одржува во Фиренца од 23-ти до 26 февруари. 

Во организација на Оксфам Италија и Фондацијата Система Тоскана, Фестивалот ќе опфати преглед на најдобрите филмови од земјите од Западен Балкан и придонесот на филмскиот фонд од регионот Тоскана.

- Многу дебитантски филмови од досега веќе етаблирани и реномирани режисери од регионот ги имале нивните премиери токму на овој фестивал. Режисерот Тозија ќе биде присутен на фестивалот и ќе го промовира  лично своето режисерско деби, соопшти „Дрим фектори“, македонски продуцент на „Џган’. 

Филмот, кој е снимен во копродукција со „Red helicopter films“ од Албанија, финансиски е поддржан од Агенцијата за филм на Република Македонија и SEE Cinema network. Главните улоги ги толкуваат Мартин Ѓоргоски, Дениз Абдула и Никола Ристановски.