Евросонг: Пет земји секогаш имаат сигурно место во финалето

На музичкиот натпревар за песна на Евровизија, додека во напнатите полуфиналиња, повеќето земји мора да се борат за своето место во финалето, на пет земји им е загарантиран директен влез. Тоа е таканаречената „Голема петорка“ држави коишто не се натпреваруваат во полуфиналињата и секогаш одат во финалето поради нивниот поголем финансиски придонес кон организаторите на натпреварувањето.

„Голема петорка“ ја сочинуваат Франција, Германија, Италија, Шпанија и Обединетото Кралство. Овие држави, заедно со земјата-домаќин, имаат загарантирано место во големото финале на Евровизија секоја година. Сите други земји учеснички мора да се квалификуваат за финалната вечер од натпреварот преку едно од двете полуфиналиња. Правилото за директен влез е воведено во 2000 година, со цел да се признае клучната улога што овие земји ја играат во финансирањето на Европската радиодифузна унија (ЕБУ), којашто стои зад Евросонгот. Како најголеми финансиски придонесувачи, нивниот директен влез во финалето ја обезбедува стабилноста на буџетот на натпреварот и гарантира висок рејтинг на главните телевизиски пазари.

Инаку, Шпанија оваа година се повлече од натпреварот поради учеството на Израел. Шпанскиот јавен радиодифузен сервис „РТВЕ“ соопшти дека нема да учествува, ниту да го прикажува музичкиот натпревар, сѐ додека Израел е меѓу учесниците. Ова значи дека оваа година, по исклучок, „Големата четворка“ (плус домаќинот Австрија) ќе се пласираат во финалето. 

МИА