ЕУ очекува проблеми за земјоделството во случај на тврд Брегзит

Колеџот на еврокомесари денеска ќе разговара за земјоделските мерки во случај на Брегзит без договор, комесарот за земјоделство вчера предупреди дека ова сценарио би предизвикало сериозни проблеми за земјоделскиот пазар, јави дописничката на МИА од Брисел.

Комисијата денеска ќе разговара за сетот мерки кои ќе можат да бидат активирани за да се спречи криза во земјоделството по евентуален тврд Брегзит на крајот на оваа недела. Во оптек се вонредни мерки како таргетирана државна помош во земјоделскиот сектор или повлекување на одредени производи. Најголем проблем, ако Британците истапат од ЕУ без претходен договор, е прашањето со ирската граница.

– Ако има царинска унија и ако има доволен степен на усогласување на стандардите меѓу ЕУ и Обединетото Кралство, ништо нема да се смени, но доколку нема договор ќе видиме кои се нашите одговорности, согласно мировниот ирски договор за да спречиме тврда граница во Ирска – изјави Фил Хоган, еврокомесарот за земјоделство.

Британците неодамна ги објавија царинските тарифи кои би стапиле во сила во случај на Брегзит без договор врз низа производи како месото, сирењето, шеќерот и оризот, кои највеќе ќе ги погодат земјите членки кои најмногу извезуваат на британскиот пазар.

ЕУ интензивно се подготвува за Брегзит без договор, кој ќе настапи на 12 април доколку британската премиерка не успее да постигне договор и да издејствува мнозинство за поддршка на компромисот постигнат со ЕУ, компромис отфрлен три пати од британскиот Парламент.

ЕУ утре ќе одржи вонреден самит за да се обиде да помогне во изнаоѓањето компромис, но топката е во рацете на Британците, оценува ЕУ.

Шефот на европскиот преговарачки тим, Мишел Барние вчера ја посети Ирска и ирскиот премиер, Лео Варадкар. Тој ги увери Ирците дека ЕУ ќе продолжи да ја поддржува земјата во случај на Брегзит без договор.

Варадкар од своја страна повтори дека неговата Влада е подготвена да прифати подолго одлагање на Брегзит.