Ердоган: Израел е окупаторска држава

Турскиот претседател Реџеп Тајип Ердоган синоќа повторно ја критикуваше одлуката на американскиот претседател Доналд Трамп да го признае Ерусалим за главен град на Израел. Ердоган го обвинби Израел дека е окупаторска држава.

Турскиот претседател оцени дека Израел „предизвикува терор со својата полиција и војници“ и додаде дека „одлуката на Трамп не е во согласност со законите или правдата“.

- Израел продолжува да се шири и да ги потиснува палестинците. Израел е држава на окупација. Тие напаѓаат цивили, вклучително и деца во Газа и на Западниот брег, спроведувајќи терор со својата полиција и војници, вели Ердоган.

Тој посочи дека во изминатите денови разговарал со светски лидери, како и со папата Франциско и дополни дека тоа не е само муслиманска работа, туку проблем и за христијаните и за Евреите.

- Лидерите треба да тежнеат кон мир, а не да предизвикуваат немири. Одлуката на Трамп не е во согласност со правото. Одлуката зададе тежок удар на Советот за безбедност на ОН. Она што денес го доживуваме е само резултат, а проблемот е во системот, истакна Ердоган.