ЕК додели 83 милиони евра за поддршка на цивилите во Украина и Молдавија погодени од руската агресија
Во пресрет на двегодишнината од почетокот на руската воена агресија врз украинската држава, Европската комисија најави дополнителна хуманитарна помош од 83 милиони евра за поддршка на цивилите во Украина и Молдавија погодени од последиците на војната.
Како што јави дописникот на МИА од Брисел, од вкупната сума, 75 милиони евра се наменети за хуманитарни проекти во Украина, како обезбедување сместување, чиста вода, образование и здравствена заштита, пред се за лицата кои живеат во областите близу до линијата на фронтот.
Останатите осум милиони евра се предвидени за хуманитарни проекти во Молдавија наменети за најранливите категории граѓани, кои вклучуваат парична помош и пристап до социјална и здравствена заштита.
Комисијата посочува дека оваа финансиска поддршка доаѓа во клучен момент, имајќи предвид дека околу 14,6 милиони луѓе во Украина имаат потреба од хуманитарна помош.
– Целните руски напади врз клучната енергетска и цивилна инфраструктура во Украина, како што се болниците, училиштата и електричната мрежа, сериозно го попречуваат пристапот на луѓето до основните услуги.
Со секое ново гранатирање, се поголем број Украинци остануваат без покрив над главата и имаат потреба од помош и засолниште во услови на ниски температури, наведува Еврокомисијата.
Со овие најнови средства за поддршка, вкупната хуманитарна помош на Европската комисија за цивилите погодени од војната во Украина од стартот на руската агресија во февруари 2022 година достигна 926 милиони евра.
Од оваа сума 860 милиони евра се доделени за хуманитарни програми во Украина, а 66 милиони евра за поддршка на украинските бегалци во Молдавија.
Руските сили ја нападнаа Украина на 24 февруари 2022 година, започнувајќи ја најголемата воена офанзива во Европа по Втората светска војна, што резултираше со најмалку 10.000 цивилни и стотици илјади воени жртви, 3,6 милиони внатрешно раселени лица и 6,3 милиони украински бегалци во други земји.
Ново на Сител
-
Во Појасот Газа за еден ден загинаа најмалку 60 луѓе, а 284 се повредени
-
Коњановски ја посети локацијата каде падна кран на градежен објект во Битола
-
ОЈО поведе постапка против скопјанец за семејно насилство кон партнерката и нејзината мајка
-
Архиепископот Охридски и Македонски г.г. Стефан чиноначалствуваше со литургијата во Стоби по повод 1700 од Првиот вселенски собор
-
Падна кран во Битола
-
ОЈО бара Арсовска да им презентира докази
-
Македонски тим од неврохирурзи и невролози добитници на 2-ра награда на Меѓународниот конгрес по невронаука | ФОТО
-
Приведен 42-годишник од Тетово, управувал со возило под дејство на алкохол