Двајца заразени од вирусот зика во Чешка

Ризикот од заразување со вирусот зика од двајцата Чеси инфицирани на патување во странство не му се заканува на никој освен на нивните сексуални партнери, а и тоа е малку веројатно.

Ова, како што јави дописникот на МИА од Прага, го изјави претседателот на Форумот за заразна, тропска и друга медицина, Растислав Маѓар предупредувајќи пред ширење на непотребна паника кај населението.

- Иако зика вирусот, исто така, може да се најде и во плунката, мајчиното млеко и урината, веројатноста за пренесување по друг пат освен преку комарци или сексуален однос е речиси невозможна, рече Маѓар.

Пациентите, се лечат амбулантно.

Вирусот е поврзан со оштетување на фетусот кај бремени жени во Латинска Америка, поради кој децата се раѓаат со помала глава и помалку развиен мозок.

Чешката Влада претходно донесе одлука, во случај на појава на вирусот во земјата да не биде активиран системот за справување со високо заразни инфекции, бидејќи вирусот не се пренесува преку воздухот како грипот.