Димитров-Петричек: Првата меѓувладина конференеција меѓу Македонија и ЕУ треба да се случи што е можно побрзо

 

Вицепремиерот задолжен за европски прашања Никола Димитров денеска оствари видео средба со министерот за надворешни работи на Република Чешка, Томаш Петричек, на која од име на Владата се заблагодари за принципиелните позиции на Чешка и целокупната поддршка за почеток на пристапните преговори на Македонија со ЕУ, соопшти Секретаријатот за европски прашања.

 

-Чешка практично го штити интегритетот на пристапниот процес во ЕУ. Без оглед на одлуките на Советот, Македонија продолжува по патот на приближување кон ЕУ и во претстојниот период од големо значење би била зајакната билатерална соработка во однос на експертиза и техничка помош главно во областа на економско управување, социјална политика, земјоделие и искористување на европските фондови, вклучително и преку инструментите ТАИЕХ и Твининг за јакнење на институционалните капацитети, истакнал Димитров.

Министерот Петричек ја потврдил посветеноста на Чешка на евроинтегративниот процес, потврдувајќи го нивниот став дека првата меѓувладина конференеција меѓу Македонија и ЕУ треба да се случи што е можно побрзо.

На средбата се разговарало и за билатералната соработка и можностите за нејзино унапредување.

-Донациите и поддршката од Чешка се од големо значење за Македонија, особено во овој период кога се справуваме со последиците од пандемијата, а покрај тоа добредојдена е и партнерската поддршка во нашите заложби да ја донесеме ЕУ дома, истакнал Димитров. Чешкиот министер пак порачал дека неговата земја е подготвена да понуди своето искуство и експертиза за прашања од доменот на регионалната соработка и добрососедски односи.