Честитка од СПМ за 8-ми Септември

Почитувани граѓани на Македонија,

Дозволете ми во мое лично име и во името на Социјалистичката партија на Македонија да ви го честитам 8-ми Септември, Денот на независноста на Република Македонија.

Денот на кој ние македонците и сите граѓани во 1991 година референдумски одлучивме Македонија да биде независна држава, остварувајќи го вековниот сон на нашите претци.

Издржавме бројни искушенија и поминавме многу премрежја, а 32 години подоцна како народ и држава повторно минуваме низ период во кој е потребно многу мудрост, храброст и одлучност во носењето на одлуките и дејствувањето. Затоа што повторно минуваме низ период во кој од внатре и од домашни апатриди ни се отворија прашањата што длабоко задираат во нашиот идентитет и битие. Во наредниот период не смееме да дозволиме непромислени одлуки од кои би се каеле и со последици кои би ги чувстувале долго во иднина. Антидржавните и антимакедонски политики мора да ги запреме, не смее да продолжи тргувањето со највисоките државни и национални интереси. Само единствени и сплотени, со јасна визија и зацртана цел, ќе успееме Република Македонија да ја одбраниме, да ја сочуваме и одново да ја ослободиме.
За да бидеме силни како никогаш до сега потребни ни се единството и сплотеноста. Не очекува изборно соочување на кое ние со нашиот народ ќе им се спротивставиме на оние кои не и сакаат добро на нашата Татковина, кои во изминатите години ја осиромашуваа, крадеа, уништуваа и ја предадоа.

Пред 32 години сонот на тогашните генерации беше независна Македонија, денес сонот на нашата генерација е економски стабилна и просперитетна држава, единствена и меѓународно почитувана.
Овие цели, заедно со евроинтегративниот пат, се правците по кои треба да се движиме и за кои секојдневно треба да работиме.
Секој од нас има сон и идеи за сопствената иднина, но најважно од сè е идејата за наша заедничка македонска иднина и дека само сплотени во единство можеме заедно да изградиме сигурна иднина за успешна и слободна Македонија.

Нека ни е честит Денот на независноста, нашиот македонски државен празник 8-ми Септември!

Социјалистичка партија на Македонија