Честитка од министерот Јолевски за празникот Рамазан-Бајрам

Министерот за одбрана на Република Македонија, Зоран Јолевски, по повод големиот муслимански празник Рамазан Бајрам, упати честитка до припадниците на Армијата на Република Македонија и до сите граѓани на Република Македонија од исламска вероисповед.

- Мирот во душата, благосостојбата во семејството и ширењето на позитивните мисли за доброто на сите треба да бидат основата на нашето живеење. Нека овој голем празник ја потврди желбата за мир и меѓусебно разбирање како императив кој што сите граѓани на Република Македонија го негуваат со години, со децении, порача министерот Јолевски во честитката.

Армијата на Република Македонија, како столб на државноста, е дом на граѓаните на нашата татковина, без оглед на нивната етничка или религиозна припадност, стои во честитката од министерот.

Овој голем празник за припадниците на исламската вероисповед, истакнува тој, нека биде водилка за сите нас да ги негуваме вредностите кои отсекогаш биле дел од Македонија – толеранцијата, соживотот, мирот и еднаквоста.