Буданов: Северна Кореја е најголемата закана по Украина

Шефот на украинското разузнавање Кирило Буданов изјави дека од сојузниците на Москва, Северна Кореја е „најголемиот проблем“ за Киев поради масивното снабдување на Русија со артилериски гранати, што се користат на украинскиот фронт.

– Од сите сојузници на Русија, нашиот најголем проблем е Северна Кореја, бидејќи со количината на воена опрема што ја снабдуваат, тие навистина влијаат на интензитетот на борбите, истакна Буданов.

Тој додаде дека Украина во моментот не може ништо да преземе против тоа. – Фактот дека испорачува и балистички проектили е непријатен, но помалку сериозен поради малата количина, посочи Буданов.

Тој оцени дека Русија ќе се обиде да стави крај на војната „пред 2026 година“, со цел да избегне слабеење на нејзините позиции поради акумулацијата на економските проблеми, главно поради западните санкции и проблемите со мобилизацијата поврзани со значителни загуби на фронтот.

САД и Јужна Кореја го обвинија Пјонгјанг дека и доставува на Русија муниција и проектили за да ја поддржи нејзината инвазија врз Украина, која трае од февруари 2022 година.

Пјонгјанг ги негира обвинувањата, но тинк-тенкот „Конфликт армамент рисрч“ (Conflict Armament Research) претходно соопшти дека анализата на остатоците покажала дека „ракетите произведени оваа година во Северна Кореја се користат во Украина“.