Брамерц: Трибуналот работеше непристрасно

Хашкиот трибунал со своите пресуди напиша голем дел од историјата на конфликтите во поранешна Југославија, покажа дека својата должност ја изврши независно, непристрасно и без оглед на националност и религија, воден само од доказите и правото, изјави главниот обвинител на Хашкиот трибунал Серџ Брамерц за „Вечерње новости“ по повод затворањето на судот.

- Мислам дека правдата е остварена преку постапки, но секогаш велам дека ова прашање треба да им се постави на жртвите, додаде Брамерц. 

Тој вели дека е задоволен од работата на обвинителството и резултатите на Трибуналот за изминатите 24 години работа.

Во однос на прашањето зошто повеќе Срби се осудени, тој одговара дека тие се бореле во Хрватска, Босна и Херцеговина и на Косово и дека „српските власти направиле страшно етничко чистење на сите тие места“.

- Доколку се прифати овој основен факт, тогаш воопшто не е за изненадување што Трибуналот осуди повеќе Срби. Ако тој факт не се прифати, што најверојатно е случај кај српските власти и во јавноста, тогаш навистина се работи за одбивање да се прифати вистината, нагласи Брамерц.