АВРМ одржа две обуки во Општина Василево

Агенцијата за вработување од Струмица денеска организираше две обуки за невработените лица и за работодавачите во општина Василево. Според директорката Павлина Георгиева, невработените лица најмногу интерес пројавиле за мерката за самовработување и за обуките.

- Задоволни сме од одѕивот на невработените лица кои дојдоа во голем број иако присуството не е задолжително. Ова е начин поблиску да се информираат за активните мерки и програми за вработување, но и да постават прашања. Најзаинтересирани се за програмата за самовработување и за обуките. Пред се за обуките за општи вештини како компјутерска технологија и јазици и обуката кај познат работодавач, изјави Георгиева.

Градоначалникот на Василево, Ванчо Стојанов вели дека како локална власт поттикнуваат намалување на невработеноста.

- Ние и досега придонесувавме за намалување на бројот на невработени. Поттикнувавме развој на индустријата, односно помагавме да ја подигнеме самата економија, и да ги мотивираме работодавците да вработат лица од општината. Се надевам дека во сите досега новоизградени капацитети во индустриските зони ќе се вработат лица жители на нашата општина, рече Стојанов.

Според податоците на Агенцијата за вработување на Република Македонија во Општина Василево има 350 активни баратели на работа.