Асфалтирана десната страна од проширениот булевар „АСНОМ“ во Скопје

Градежните работи за проширување на булеварот „АСНОМ“, на потегот од крстосницата со булеварот „Србија“ до крстосницата со улицата „Васко Карангелевски“ се во тек. Изминатиов период целосно е асфалтирана десната страна од проширениот булевар, а набрзо ќе почне да се асфалтира левата страна, информира Град Скопје.

- Должината на трасата во првата фаза изнесува 845 метри, новиот булевар добива по три коловозни ленти во двете насоки, средишно зеленило, пешачки и велосипедски патеки. Ова е првата од трите фази за изградба на овој булевар, а во наредните фази ќе биде изграден мост на реката Вардар и проширениот булевар ќе се поврзе со булеварот „Гоце Делчев“.

Со целосната реализација на овој капитален проект, од градот посочуваат дека ќе се добие брзо, безбедно и модерно сообраќајно поврзување на општините Аеродром, Центар и Гази Баба.