Апелација ја бранеше пресудата па се огради од неа

Скопска Апелација во соопштение објавено на официјалната страна утринава ја бранеше пресудата против Македонски Телеком со која компанијата е задолжена да плати 4 милиони евра на човек фирма од Штип.

"Во врска со известувањето на Македонски Телеком АД за пресудата од 04 јули годинава Апелациониот суд Скопје ги отфрла неоснованите обвинувања за евентуални неправилности или надворешни влијанија врз донесената пресуда и притоа ја информира јавноста за следното:

Тужителот во оваа постапка барал надомест на штета која произлегува од правосилно Решение на Комисијата за заштита на конкуренцијата од 2012 година, потврдено со пресуда на Управниот и Вишиот управен суд, а со кое е утврдено дека Македонски Телеком извршил злоупотреба на монополската позиција така што го исфрлил тужителот од пазарот и му оневозможил да обавува дејност. При постоење на правосилен основ за право на штета и вештачење изготвено по налот и барање на суд, првостепениот суд, после 16 години водење на постапка, го одбил тужбеното барање на тужителот. Ваквата пресуда, второстепениот суд ја преиначи и делумно го уважи тужбеното барањена тужителот."

Судот во ова првично соопштение остро му се обрати на Македонски Телеком.

"Се укажува на Македонски Телеком АД Скопје да не се смета за компанија која е над законот и да не изнесува шпекулации и невистини против судии на Апелациониот суд Скопје кои претставуваат класичен притисок врз Судскиот совет на РСМ, а правата од судските постапки да ги остваруваат пред судовите, во случајов пред Врховниот суд на Македонија, пред кој имаат право да изјават ревизија.", пишува во соопштението под кое не беше прецизирано кој го пишува и објавува.

Неколку часа подоцна на веб страната на судот осамна ново известување.

"Апелациониот суд Скопје појаснува дека во соопштението за јавност објавено на ден 23.08.2024 година се содржани ставови на судечкиот совет кој постапувал по предметот ТСЖ-1136/23.", стои во известувањето со кое судот како целина се огради пд судиите кои ја донеле одлуката.