Алонсо жали што не ја напушти Формула 1 пред 2018 година

Возачот на Алпин, Фернандо Алонсо, жали што не се повлече од Формула 1 пред 2018 година.

– Дали се каам за нешто? Веројатно само за едно – тоа што заминав предоцна. Морав да ја напуштам Формула 1 порано. Сега е лесно да се каже, но не требаше да чекам до 2018 година. Требаше да заминам во 2015 или 2016 година, две години порано, да го пробам Дакар и трките за издржливост. Веќе во 2015 година имав такви размислувања, но ми требаше време за да одлучам. Можеби премногу време, изјави Алонсо за Планет Ф1.

Во 2015 година, шпанскиот пилот се пресели од Ферари во Мекларен. Во 2018 година донесе одлука да се повлече од Формула 1, но во 2020 година се врати и стана возач на Алпин. Актуелниот договор на 40-годишниот Алонсо со Алпин е со важност до крајот на сезоната 2022 година.