Зеленски разговараше со Макрон за забрзување на мировниот процес во Украина

Украинскиот претседател Володимир Зеленски изјави синоќа дека разговарал со неговиот француски колега Емануел Макрон за „забрзување на мировниот процес“ во Украина поради стравувањата од руска инвазија.

„Продолжување на дијалогот со Емануел Макрон за борба против безбедносните предизвици и забрзување на мировниот процес во Нормандискиот формат“, напиша Зеленски на Твитер по разговорот со Макрон.

Нормандискиот формат за решавање на украинската криза е воспоставен во јуни 2014 година, кога за ова прашање на маргините на годишнината од истоварувањето на сојузниците во Нормандија во Втората светска војна, разговараа тогашната германска канцеларка Ангела Меркел и претседателите на Русија, Франција и Украина, Владимир Путин, Франсоа Оланд и Петро Порошенко.